Իգոր Պադերինը ծնվել է 1989 թվականի նոյեմբերի 24-ին Օմսկ քաղաքում: 5 տարեկանում նա սկսել է ֆուտբոլով զբաղվել տեղի «Դինամո» ակումբի դպրոցում, ապա տեղափոխվում «Մոլնիա»: 12 տարեկան հասակում նա կարճ ժամանակով տեղափոխվում է Տոլյատիի Կոնոպլյովի ակադեմիա, որտեղից էլ տեղափոխվում է Պերմի «Ամկար»։ Այստեղ 5 տարի մարզվում է ակումբի ինչպես երիտասարդ, այնպես էլ հիմնական կազմի հետ:

Այնուամենայնիվ, Պադերինի առաջին պրոֆեսիոնալ թիմը 2008 թվականին դառնում է Կեմերովոյի «Կուզբաս» ֆուտբոլային ակումբը, որն այդ ժամանակ հանդես էր գալիս Ռուսաստանի առաջնության երկրորդ լիգայի «Արևելք» գոտում: 2010-ին հարձակվողական ոճի կիսապաշտպանը տեղափոխվում է Վլադիմիրի «Տորպեդո», որի հետ նույն մրցաշրջանում դառնում է Ռուսաստանի ՊՖԼ-ի Արևմտյան գոտու չեմպիոն:

2011/12 մրցաշրջանում Պադերինը միանգամից 2 թիմ է փոխում՝ նախ Կրասնոդարի «Կուբան» ֆուտբոլային ակումբը, իսկ հետո Պերմի «Ամկարը»: 2012-ին ֆուտբոլիստը միանում է «Տյումեն» ֆուտբոլային ակումբին, որտեղ անցկացնում է 10 պաշտոնական հանդիպում։ 2014-ին Պադերինը տեղափոխվում է «Սոչի», իսկ արդեն 2015-ին՝ «Արմավիր», որի կազմում հանդես գալով 5 մրցաշրջան՝ անցկացնում է իր կարիերայի ամենաերկար և հաջող ժամանակահատվածը: Իսկ 2017/18 մրցաշրջանում թիմի կազմում նա դառնում է Ռուսաստանի ՊՖԼ-ի Հարավային գոտու չեմպիոն:

2020-ի ձմեռային տրանսֆերային պատուհանի ընթացքում Պադերինը տեղափոխվում է Երևանի «Ուրարտու», բայց վեց ամիս անց նա որոշում է կայացնում ավարտելու ֆուտբոլիստի կարիերան: Կես տարի անց Իգոր Պադերինը վերսկսում է պրոֆեսիոնալ ֆուտբոլիստի կարիերան ու վերադառնում է «Ուրարտուի» կազմ:

ՊԱԴԵՐԻՆԻ ԽԱՂԱՅԻՆ ԿԱՐԻԵՐԱՆ