Վադիմ Պարամոնովը ծնվել է 1991 թվականի մարտի 18-ին, ուկրաինական Պավլոգրադ քաղաքում։ Ֆուտբոլով սկսել է զբաղվել 12 տարեկանից՝ հաճախելով տեղի ֆուտբոլային դպրոց։ 2004 թվականին նա տեղափոխվել է Դնեպրոպետրովսկի «Ինտեր» ֆուտբոլային ինտերնատ։

17 տարեկան հասակում պաշտպանը միանում է «Դնեպր-75» թիմին, որը հանդես էր գալիս Ուկրաինայի երկրորդ լիգայում։ 2010-ին Վադիմ Պարամոնովը տեղափոխվում է Լուգանսկի «Զարյա», որի կազմում 4 տարի է անցկացնում՝ դառնալով երիտասարդական առաջնության չեմպիոն։ Այնուհետև տեղափոխվում է Ուկրաինայի Առաջին լիգայում հանդես եկող «Պոլտավա» ՖԱ։ 2017/18 մրցաշրջանում թիմը զբաղեցնում է երկրորդ հորիզոնականն ու բարձրանում Ուկրաինայի Պրեմիեր լիգա։ 2018/19 մրցաշրջանում Պարամոնովն արդեն «Լվովի» ֆուտբոլիստ էր։ Հաջորդող 2 տարիներին պաշտպանը երկու ակումբ է փոխում՝ «Կոլոսը» և «Ռուխը»։ Պարամոնովը հանդես է եկել նաև Ուկրաինայի Մ-21 տարեկանների հավաքականում։

2021-ի ձմռանը 30-ամյա պաշտպանը պայմանագիր է ստորագրում «Ուրարտու» ֆուտբոլային ակումբի հետ։ Նորամուտը թիմի կազմում Պարամոնովը նշում է VBET Հայաստանի Պրեմիեր լիգայի 6-րդ տուրից հետաձգված «Արարատի» հետ խաղում։