Պյոտր Տենը ծնվել է 1992 թվականի հուլիսի 12-ին Մոսկվայում: 6 տարեկանում սկսել է զբաղվել ֆուտբոլով՝ հաճախելով Մոսկվայի ԲԿՄԱ-ի մանկապատանեկան դպրոց: 16 տարեկանում նա սկսել է հանդես գալ ԲԿՄԱ-ի երիտասարդական թիմում, իսկ 17 տարեկանում համալրում է բանակայինների հիմնական կազմը, որտեղ 2 տարի է անցկացնում, իսկ 2012/13 մրցաշրջանում դառնում է Ռուսաստանի չեմպիոն և երկրի գավաթակիր: 2013/14 մրցաշրջանում Պյոտր Տենը վարձավճարով տեղափոխվում է Վոլգոգրադի «Ռոտոր» ֆուտբոլային ակումբ, իսկ հաջորդ մրցաշրջանում պաշտպանը կրկին վարձակալական հիմունքներով միանում է Մախաչկալայի «Անժիին», որի հետ Պրեմիեր լիգայում հանդես գալու իրավունք է վաստակում:

2015/16 մրցաշրջանում նրան ձեռք է բերում Տոմսկի «Տոմ» ֆուտբոլային ակումբը, որի կազմում ընդգրկվելուց ընդամենը 1 տարի անց ֆուտբոլիստը թիմի հետ Պրեմիեր լիգայի ուղեգիր է վաստակում: Տոմսկում Տենը խաղում է երկու մրցաշրջան, որից հետո ԲԿՄԱ-ի սանի հաջորդ ակումբը դառնում է «Ենիսեյը», որտեղ նույնպես երկու մրցաշրջան է անցկացնում ու կրկին բարձրանում է Պրեմիեր լիգա: 2018/19 մրցաշրջանում վերադառնալով «Տոմ»՝ Պյոտրը կես մրցաշրջան է անցկացնում, որից հետո տեղափոխվում է «Արմավիր»: Ռուս պաշտպանի վերջին ակումբը Բելառուսի առաջնությունը ներկայացնող «Մինսկն» էր, որի կազմը ֆուտբոլիստը համալրել էր 2020 թվականին:

2021 թվականի ձմեռային տրանսֆերային պատուհանի ընթացքում Տենը միանում է «Ուրարտուին»: Նորամուտը թիմի կազմում Տենը նշում է VBET Հայաստանի Պրեմիեր լիգայի 6-րդ տուրից հետաձգված «Արարատի» հետ խաղում։ 

Պյոտր Տենը հրավիրվել է նաև Ռուսաստանի Մ-16, Մ-17, Մ-18, Մ-21 և Մ-23 տարեկանների հավաքականներ: