ՓԻԼՈՅԱՆԻ ԳՈԼՆ «ՈՒՐԱՐՏՈՒԻ» ՀԱՄԱՐ 1300-ՐԴ ԷՐ ՀԱՅԱՍՏԱՆԻ ԱՌԱՋՆՈՒԹՅՈՒՆՆԵՐՈՒՄ
28/08/2023ԷՐԻԿ ՓԻԼՈՅԱՆԸ ՀԵՂԻՆԱԿԵՑ «ՈՒՐԱՐՏՈՒԻ» ՀՈԲԵԼՅԱՆԱԿԱՆ՝ 1300-ՐԴ ԳՆԴԱԿԸ
Առաջնության 5-րդ տուրում «Շիրակի» դարպասն Էրիկ Փիլոյանի խփած գնդակը Հայաստանի առաջնություններում մեր թիմի հոբելյանական` 1300-րդ գոլն էր: Հատկանշական է, որ այն նաև Հայաստանի առաջնություններում «Շիրակի» բաց թողած 1000-րդ գոլն էր: Էրիկ Փիլոյանը IDBank Հայաստանի Պրեմիեր լիգայում երկրորդ գոլը խփեց: 22-ամյա պաշտպանը մեր թիմի կազմում գոլերի հաշիվը բացել էր նախորդ մրցաշրջանում՝ ապրիլի 27-ին սեփական հարկի տակ կրկին գրավելով «Շիրակի» դարպասը:
Մեր թիմը դարձավ Հայաստանի առաջնություններում 1300-րդ գոլի սահմանագիծը հատած ընդամենը 3-րդ ակումբը՝ հոբելյանը նշելով անցկացրած 716-րդ խաղում: Ավելի արդյունավետ են գործել միայն «Փյունիկը»՝ 1783 գոլ (812 խաղում) և «Շիրակը»՝ 1417 գոլ (832 խաղում)։
Հայաստանի առաջնություններում մեր թիմն իր գոլերի հաշիվը բացել է անցկացրած 3-րդ խաղում՝ 1992թ. ապրիլի 19-ին Աբովյանում «Նաիրիի» հետ կայացած խաղում, որում «Բանանցը» հաղթել էր 3-0 խոշոր հաշվով: Անդրանիկ գոլի հեղինակ էր դարձել Վարուժան Խաչատրյանը՝ 25-րդ րոպեին գրավելով Արարատ Ղազարյանի պաշտպանած դարպասը: Իսկ մինչև այդ «Արարատի» և «Մալաթիայի» հետ կայացած մեկնարկային երկու հանդիպումներում էլ գրանցվել էր գոլազուրկ ոչ-ոքի:
Հենց 1992թ. Հայաստանի անդրանիկ առաջնությունում էլ «Բանանցն» իր առաջին հոբելյանը նշեց՝ խփելով 100-րդ գոլը: Այն գրանցվեց հոկտեմբերի 17-ին Էջմիածնում տեղի «Զվարթնոցի» հետ կայացած հանդիպման 55-րդ րոպեին, երբ Գևորգ Քամալյանը գրավեց Հայկ Կիրակոսյանի պաշտպանած դարպասը:
Էրիկ Փիլոյանն «Ուրարտուի» հոբելյանական գոլի հեղինակ դարձած թիմի 10-րդ ֆուտբոլիստն է: Առավել հաջողակ են գտնվել Կարեն Միքայելյանը, Արսեն Բալաբեկյանը և Վալտեր Պողոսյանը, որոնց բախտ է վիճակվել 2-ական անգամ խփել թիմի հոբելյանական գոլերը: Հոբելյանական գոլերի հեղինակների թվում են թիմի լեգեոնական 3 ֆուտբոլիստներ՝ Էդուարդո Դոս Սանթոսը, Էդվարդ Կպոդոն և Ջոնել Դեսիրեն:
Բացառությամբ 1000-րդ գոլի, «Ուրարտուի» հոբելյանական մյուս գնդակները խփվել են թիմի հաղթած հանդիպումներում:
Գոլերի քանակ | Ֆուտբոլիստ | Ամսաթիվ | Մրցակից | Հաշիվ |
---|---|---|---|---|
100 | Գևորգ Քամալյան | 17.10.1992 | «Զվարթնոց» | 4-1 |
200 | Կարեն Միքայելյան | 20.09.1993 | «Վան» | 6-2 |
300 | Կարեն Միքայելյան | 10.08.1994 | «ԲՄԱ Արայի» | 3-1 |
400 | Տիգրան Եսայան | 24.09.2002 | «Լոռի» | 10-0 |
500 | Արա Հակոբյան | 16.11.2003 | «Լեռնագործ» | 7-0 |
600 |
Արսեն Բալաբեկյան | 21.05.2006 |
«Կիլիկիա» |
5-1 |
700 |
Արսեն Բալաբեկյան | 29.09.2007 |
«Շիրակ» |
2-0 |
800 |
Էդուարդո Դոս Սանթոս | 01.05.2010 |
«Կիլիկիա» |
3-0 |
900 |
Վալտեր Պողոսյան | 16.06.2012 |
«Արարատ» |
3-1 |
1000 |
Վալտեր Պողոսյան | 03.05.2015 |
«Արարատ» |
2-2 |
1100 |
Էդվարդ Կպոդո | 25.08.2018 | «Արարատ» | 4-2 |
1200 | Ջոնել Դեսիրե | 17.11.2021 | ԲԿՄԱ | 5-0 |
1300 | Էրիկ Փիլոյան | 26.08.2023 | «Շիրակ» | 2-0 |