«Ուրարտուի» երկարամյա աշխատակից Սիմոն Իսրայելյանի հիշատակին նվիրված հուշամրցաշարի սկիզբը դրվեց 2022 թվականի մարտի 9-ին՝ Սիմոնի ծննդյան օրը։ Արդեն երրորդ տարին «Ուրարտու» ֆուտբոլային ակումբում տեղի ունեցավ արցախյան 44-օրյա պատերազմի հերոսի անվան հուշամրցաշարը, որն անցկացվեց մարտի 13-17-ը։ Այս տարվա մասնակիցներն էին «Ուրարտու-մարզիչներ», «Ազատության արծիվներ», «Փյունիկ», «Հայաստանի լրագրողների թիմ», «Ուրարտու-վետերաններ», «Հայաստանի վետերաններ», «Սաութ-Վեստ Ուլտրաս» և «Արտաշատ» թիմերը։

Մրցաշարի երրորդ տեղի համար պայքարում «Արտաշատ» թիմը պարտության մատնեց «Հայաստանի լրագրողներ» թիմին։ Եզրափակիչ խաղում իրար հետ մրցեցին «Ուրարտու-մարզիչների» և «Ուրարտու-վետերանների» թիմերը։ Համառ ու անզիջում պայքարում վետերանները 2 անպատասխան գնդակ ուղարկեցին մրցակցի դարպասը։ Մեկական անգամ գոլով աչքի ընկան Վահագն Այվազյանն ու Արսեն Բալաբեկյանը։

Մրցաշարի լավագույն ֆուտբոլիստի կոչմանն արժանացավ «Ուրարտու-վետերանների» դարպասապահ, մեր գլխավոր թիմի դարպասապահների մարզիչ Ստեփան Ղազարյանը, իսկ «մարզիչների» հարձակվող Արթուր Բարսեղյանը 8 գոլով դարձավ մրցաշարի լավագույն ռմբարկու։

Եզրափակիչ հանդիպումից հետո բոլոր մրցանակակիրները պարգևատրվեցին մեդալներով, իսկ հաղթող թիմը նաև պատվավոր գավաթով, որոնք հանձնեցին Սիմոն Իսրայելյանի հայրը՝ Սպարտակ Իսրայելյանը և «Ուրարտուի» գլխավոր մարզիչ Դմիտրի Գունկոն։

Հավելենք, որ ավանդույթի համաձայն, մայիսին կկայանա արդեն Simon Cup միջազգային մանկապատանեկան մրցաշարը։